拜六是學校的運動會，逐工運動埕攏有國小學生咧練習搝大索、走標、拍風雷，老師會帶小朋友去看大哥哥大姊姊練習，佇走標活動時，小朋友真熱情，加油的聲音滿四界！小朋友嘛觀察著運動埕有掛五彩的旗仔佇空中飛，實在真媠！教室內有運動比賽的圖卡，提供小朋友觀察。阮嘛練習和運動相關的閩南語念謠【運動會】，透過歌謠來加深運動會中各種比賽的講法。
◎念謠【運動會】：學校舉辦運動會，五彩的旗仔佇空中飛，高手來相會，來遮比懸低，跳懸的展輕功，走標的走若飛，搝大索，嘿嘿嘿！加油的聲音滿四界。

因為運動會的關係，逐家有機會會使欣賞和了解各種比賽的講法，原來平常時講的「扯鈴」叫做拍風雷，「賽跑」叫做走標，「跳高」叫做跳懸，「拔河」叫做搝大索，實在真趣味。遮的和中文講法較無仝的活動，透過每日親目看著國小學生的練習，以及趣味的唸謠內容，小朋友嘛攏學佮真緊。教室內有運動項目的圖卡，小朋友攏做伙來耍，有人出題，有人搶咧回答，真正趣味。